Uşaqları Beynəlxalq Müdafiə günü münasibətilə Şirvan Dövlət Rəsm Qalereyası və Mədəniyyət Mərkəzinin Folklor evi birlikdə tədbir keçirmişlər. Qalereyada keçirilmiş tədbiri giriş sözü ilə ekskursiyaçı Şəbnəm Əhmədova açmışdır. Ş.Əhmədova Uşaqları Beynəlxalq Müdafiə günü, Azərbaycan Respublikasında uşaqlara hərtərəfli dövlət qayğısı haqqında məlumat vermiş, Şirvan şəhərinin mədəniyyət müəssiələrinin, o cümlədən Dövlət Rəsm Qalereyasının keçirdiyi mədəni-kütləvi tədbirlərdə uşaqların fəal iştirakından bəhs etmişdir. Folklor evində fəaliyyət göstərən dərnəklərin üzvləri İsmayıl İmamverdiyev, Adil Kərimli və Rəvan Hüseynovun ifasında uşaq mahnıları səslənmişdir. Sonra tamaşaçılara Sabirabad rayonunun Güdəcühür kənd tam orta məktəbinin şagirdləri Türkan Əliyeva, Nazlı Gülməmmədli, Əli Bayramlı, Əsma İbrahimli, Süsən Umudlu, Zümrüd Adıyeva, Səma Gülmalıyeva, Surə Piriyeva və Əfsun Məmmədzadənin çəkdiyi rəsmlərdən ibarət sərgi təqdim olunmuşdur. Şirvan şəhər Heydər  Əliyev Mərkəzinin direktoru Aynur Fərzəliyeva və Mədəniyyət Mərkəzinin direktoru Namidə Namini mədəniyyət müəssisələrinin keçirdiyi tədbirlərdə fəal iştirak edən uşaqlara fəxri fərmanlar təqdim etmişlər.