Müxtəlif  bölgələrin mədəniyyət müəssisələri arasında əməkdaşlıq əlaqələri yaratmaq və inkişaf etdirmək məqsədilə Şirvan Dövlət Rəsm Qalereyasının kollektivi və dərnək üzvləri Quba rayon Heydər Əliyev Mərkəzində rəsm əsərlərindən ibarət sərgi təşkil etmişlər. Ümummilli lider Heydər Əliyevin anadan olmasının 95, Azərbaycan Xalq Cümhuriyyətinin 100 illiyinə həsr olunmuş sərgidə 17 nəfər qalereya əməkdaşı və dərnək üzvünün otuzdan artıq rəsm əsəri və dekorativ- tətbiqi sənət nümunəsi olan əl işi nümayiş olunmuşdur.

         Quba rayon Heydər Əliyev Mərkəzinin diektoru  Elza Orucova sərginin açılışında çıxış edərək mədəniyyət müəssisləri arasında əməkdaşlığın əhəmiyyəti barədə danışmışdır. Şirvan Dövlət Rəsm Qalereyasının direktoru Çinarə Vəliyeva səmimi qonaqpərvərlik və yüksək təşkilatçılıq üçün qubalılara təşəkkürünü bildirmiş, açılışda iştirak edən tamaşaçılara sərgiyə çıxarılmış əsərlər və onların müəllifləri haqqında məlumat vermişdir.

         Şirvanlılar Qubanın görməli yerlərinə də getmiş, meşələrdə, parklarda, Qudyalçada, Təngəaltı kəndində plener rəsmlər üçün etüdlər çəkmişlər.

         Şirvan Dövlət Rəsm Qalereyasının əməkdaşları və dərnək üzvləri Qubadan ayrıldıqdan sonra Xaçmaz rayonuna da səfər etmiş, kitab bayramının iştirakçısı olmuş, görməli yerlərırin etüdlərini çəkmişlər.