Mil-Muğan Regional Mədəniyyət İdarəsinin tabeliyində fəaliyyət göstərən Beyləqan rayon Mədəniyyət Mərkəzində Beyləqan rayon İcra Hakimiyyətinin təşəbbüsü və Beyləqan rayon mədəniyyət müəssisələrinin təşkilatçılğı ilə Azərbaycan Respublikasının əməkdar artisti, Mədəniyyət və İncəsənət Universitetinin professoru Ağalar Bayramovla görüş keçirilib.

Tədbirdə rayon İcra Hakimiyyətinin başçısı Əziz Əzizov, YAP Beyləqan rayon təşkilatının, hüquq mühafizə orqanlarının rəhbərləri, Mədəniyyət və İncəsənət Universitetinin müəllimi, sənətşünaslıq üzrə fəlsəfə doktoru Əsəd Rzayev, rayonun idarə, müəssisə və təşkilatlarının əməkdaşları, şəhid ailələri, qazilər, veteranlar, AYB Beyləqan bölməsinin üzvləri, QHT, KİV və ictimaiyyət nümayəndələri iştirak edib.

Şəhidlərin əziz xatirəsinin bir dəqiqəlik sükutla yad edilməsi ilə başlayan tədbirdə, öncə sənətkarın həyat və yaradıcılığına həsr olunmuş videoçarx nümayişi olunub.

Tədbirdə rayon İcra Hakimiyyətinin başçısı Əziz Əzizov və digər natiqlər çıxış edərək Ağalar Bayramovun Azərbaycan mədəniyyətinə bəxş etdiyi töhfələrdən bəhs edib, yaradıcılığının kamillik dövrünü yaşayan bədii-qiraətçiyə uğurlar arzulayıb və icra hakimiyyəti adından qonağa Fəxri Diplom və qiymətli hədiyyələr təqdim olunub.

Ağalar Bayramov görüşün təşkilində əməyi keçən və onun yaradıcılığına yüksək dəyər verən hər bir kəsə minnətdarlığını bildirərək əzəmətli, təkrarolunmaz ifası ilə tədbirdə tanınmış şairlərin şeirlərindən parçalar səsləndirib.

Ustad qiraətçinin təqdim etdiyi şeirlər tamaşaçılar tərəfindən coşqu və alqışlarla qarşılanıb.

Şair Gileyli Bəylərin səsləndirdiyi bədii poeziya nümunələri, görkəmli xanəndə Zahid Quliyevin ifası, rayon Mədəniyyət Mərkəzinin əməkdaşı, mədəniyyət işçisi Nazim Çıraqovun çıxışı və mədəniyyət nümayəndələrinin təqdim etdiyi musiqi nömrələri tədbirə xüsusi rəng qatıb.

Tədbirin sonunda qonaqlarla xatirə şəkilləri çəkilib.