Mədəniyyət işçilərinin, rayon ictimaiyyətinin, xüsusilə gənclərin əksəriyyət təşkil etdiyi tədbirdə çıxış edən Mil-Muğan Regional Mədəniyyət İdarəsinin rəisi Faiq Xudanlı tanınmış ədibi salamlayaraq dəvəti qəbul edib oxucularla görüşə gəldiyi üçün yazıçıya təşəkkürünü bildirib. İdarə rəisi qeyd edib ki, yazıçı ilə görüş gənclərin Elxan Elatlı yaradıcılığına olan marağından yaranan bir ideya olub.

Tədbirin moderatoru Ağalar Ağammədov yazar E.Elatlının həyat və yaradıcılığı barədə iştirakçılara məlumat verib.

Daha sonra iştirakçıları xoş ovqatla salamlayan E.Elatlı oxucularla görüşdən məmnunluq hissi duyduğunu bildirib və müəllifi olduğu bir sıra əsərləri haqqında məlumat verib, onların məzmunundan və müraciət etdiyi mövzulardan söz açıb. Qarşılıqlı dialoq şəklində keçən tədbirdə yazıçı bədii ədəbiyyatla, eyni zamanda vətənpərvərlik, milli birlik kimi yüksək mənəvi-əxlaqi dəyərlərlə bağlı öz fikirlərini bölüşüb, oxucuları maraqlandıran sualları cavablandırıb.

Müəllif oxucular üçün “Qanun”, “Xan”, “Teas-press” nəşriyyatlarının nəşr etdiyi, "Hophopnamə" Kitab Mərkəzində satışda olan kitablarını imzalayaraq onlara təqdim edib.

Görüşün sonunda qonağa Mil-Muğan Regional Mədəniyyət İdarəsi tərəfindən hədiyyə təqdim edilib və xatirə şəkli çəkilib.