Mil-Muğan Regional Mədəniyyət İdarəsinin təşəbbüsü və Mədəniyyət İşçiləri Həmkarlar İttifaqının region üzrə komitlərinin dəstəyi ilə noyabrın 11-də 9-cu Bakı Beynəlxalq Kitab Sərgisinə və Qobustan Milli Tarix-Bədii Qoruğuna ekskursiya təşkil olunub.

İdarənin xidməti əhatəsindəki rayonlar üzrə ümumilikdə 4 avtobusla yola düşən kollektiv öncə 9-cu Bakı Beynəlxalq Kitab Sərgisində iştirak ediblər.

Mədəniyyət Nazirliyinin təşkilatçılığı ilə Bakı Ekspo Mərkəzində təşkil olunan 9-cu Bakı Beynəlxalq Kitab Sərgisinin açılışında İdarə kollektivi Azərbaycanın xalq yazıçıları və şairləri, tanınmış gənc yazarlar və məşhur xarici yazıçılarla görüşüblər, təqdimat mərasimlərində iştirak ediblər, müxtəlif nəşriyyatların nəşr etdiyi kitablarla tanış olublar.

Daha sonra Qobustan Milli Tarix-Bədii Qoruğu ziyarət olunub. Ziyarət zamanı qonaqlara Qobustan abidələri, burada aparılan elmi-tədqiqat işlərinin nəticələri, qoruqda görülən işlər barədə məlumatlar verilib. Qobustan qayalarındakı insan, heyvan, kollektiv əmək, qayıq, döyüş və ov səhnələrinin təsvirləri ziyarətçilərin böyük marağına səbəb olub.

Müsbət təəssüratlarla başa çatan ekskursiyada xatirə fotoşəkilləri çəkilib.

9-cu Bakı Beynəlxalq Kitab Sərgisinin təşkilatçılarına və Qobustan Milli Tarix-Bədii Qoruğunun rəhbərliyinə təşəkkürümüzü bildiririk.