27 iyul 2021-ci il tarixində Saatlı rayonunun  Nəsimikənd kəndində  Nəsimikənd kənd Folklor evinin və Nəsimikənd kənd “Adıgün” Mədəniyyət evinin birgə təşkilatçılığı ilə “Mədəni kənd - mədəni mühit” layihəsi çərçivəsində tədbir keçirilmişdir.

 

Tədbirdə Axıska türklərinin adət-ənənələrini, mədəniyyətini, folklorunu, mətbəxini özündə əks etdirən bir-birindən maraqlı kompozisiyalar tamaşaçılara təqdim olunmuşdur. Axıska türklərinin mətbəx nümunələrindən mantının, qətmərin və digər xəmir xörəklərinin hazırlanması və bişirilməsi tədbir iştirakçıları tərəfindən maraqla qarşılanmışdır. Daha sonra bir-birindən maraqlı rəqslər, mahnılar tamaşaçılara nümayiş olunmuşdur. Təqdim olunan hər bir kompozisiya barədə ətraflı məlumat verilmişdir. Nəsimikənd kənd mədəniyyət müəssisələrinin bədii özfəaliyyət kollektivi öz müxtəlif musiqi nümunələri ilə tədbirə xüsusi rəng qatmışlar.

 

Sabirabad Regional Mədəniyyət İdarəsinin rəisi Fərid Qurbanzadə, Axıska Türkləri Vətən İctimai Birliyinin İdarə Heyətinin sədri İsmayıl Rəhimov tədbirdə iştirak etmişlər. Azərbaycan Respublikasında mövcud milli-mədəni müxtəliflik mühitinin qorunmasına yönəldilən dövlət siyasətinin tərkib hissəsi olan tədbirin keçirilməsi multikulturalizm sahəsində əsrlərdən bəri toplanmış böyük tarixi təcrübənin xüsusi qayğı ilə əhatə olunması, zənginləşdirilməsi, cəmiyyətdə bu istiqamətdə qazanılmış nailiyyətlərin təbliğinin gücləndirilməsi məqsədi daşıyır.